Milani po shqyrton mundësinë e blerjes së Adrien Rabiot, i cili nuk është më pjesë e planeve të Marsejës. Dihet që lojtari pëlqehet shumë nga trajneri Massimiliano Allegri dhe tashmë drejtuesit e klubit kuqezi kërkojnë që të përfitojnë nga situata e krijuar.

Mesfushori aktualisht është jashtë skuadrës për arsye disiplinore dhe u shpall i shitshëm nga klubi francez pas një grindjeje të dhunshme me Jonathan Rowe (i cili është gjithashtu në shitje) pas ndeshjes kundër Rennes.

Klubi, në një deklaratë zyrtare, njoftoi pozicionet e dy lojtarëve: “Olympique Marseille informon se Adrien Rabiot dhe Jonathan Rowe janë vendosur në listën e transferimeve nga klubi. Ky vendim u mor për shkak të sjelljes së papranueshme në dhomën e zhveshjes pas ndeshjes kundër Stade Rennais FC, në marrëveshje me stafin e trajnerëve dhe në përputhje me kodin e brendshëm të sjelljes së klubit.”

Rabiot do të ishte zëvendësuesi perfekt për Reijnders, por pengesa është ende paga e ish-lojtarit të Juventusit te Marseille: 3.5 milionë euro, e cila mund të rritet në 5 milionë euro me disa bonuse. Pa përmendur që mesfusha, me Modric, Ricci, Jashari, Fofana dhe Loftus-Cheek, është tashmë e mbushur me lojtarë.