Në “Air Albania” Dinamo City dhe Hajduk Split i kanë dhënë jetë një takimi që do të mbahet mend gjatë nga tifozët e të dy ekipeve. Formacioni shqiptar mund të kualifikohej për më tej nëse merrte një fitore me dy gola diferencë pasi kishte humbur takimin e parë me shifrat 2-1.

Zabërgja bëri gjithçka mirë pasi shënoi një gol të hershëm në minutën e 14-të duke i dhënë një sinjal të qartë të tijve se kualifikimi nuk ishte më një utopi. Ekipi i Ilir Dajës besoi deri në fund duke vendosur në vështirësi Hajduk-un, i cili ishte më fat në minutën e 60’ pasi mes Devi Bregut dhe golit u fut në mes vetëm tranversa, e cila pengoi sferën të shkonte në rrjetë.

Në të 78′ ekipi kroat mbeti me 10 lojtarë pasi Saniang u ndëshkua me kartonin e dytë të verdhë për një ndërhyrje të gabuar në sulm ndaj Qardakut. Ky episod i dha edhe më shumë besim Dinamo City-t se mund të bënte diçka më shumë në superioritet numerik, por në shtesa ekipi mik përdori eksperiencën e grumbulluar në të tilla kompeticione ndër vite duke gjetur golin e barazimit (Karaçiç, 99′), i cili i jepte kualifikimin.

Por dinamovitët nuk u dorëzuan dhe brenda dy minutash i dhanë dy goditje të forta formacionit kroat. Qardaku në të 109’ dhe Berisha në të 111’ shënuan respektivisht golin e dytë dhe të tretë për Dinamon, e cila fitoi ndeshjen 3-1 duke u kualifikuar për tej falë rrezultatit të përgjithshëm 4-3.

Barazimi në Lubjanë kishtë lënë të hapur çështjen kualifikim për Egnatian, e cila zhvilloi dje në mbrëmje një ndeshje më dy fytyra përballë ekipit të Olimpija-s.

Regi Lushkja çeli serinë e golave në minutën e 6’, por ekipi mik përmbysi gjithçka falë Jelenkoviç (32’) dhe Marin (79’).  Minutat e fundit të ndeshjes ishin decizive për vendasit, të cilët u dënuan që të luanin me një lojtar më pak pasi Yahaya u ndëshkua me të verdhë dy herë brenda pak minutash.

Inferioriteti numerik nuk pengoi ekipin e Tetovës që të shfrytëzonte entuziazmin e publikut vendas për të gjetur edhe golin e dytë, i cili kishte për autor të përhershmin, Lushkja (86’).

Për të vendosur se cila prej skuadrave do të kalonte për më tej u luajtën edhe dy shtesat nga 15’ ku ekipi mik shfrytëzoi lodhjen e vendasve, të cilët i ndëshkoi edhe dy herë të tjera me Durdov (99’) dhe Blanco (107’).

Me humbjen me shifrat 4-2 kampionët e Shqipërisë eliminohen nga Conference League 2025-2026. Tifozët vendas mund të ngushëllohen me faktin se asistuan në takimin e fundit të Regi Lushkjës me fanellën e Egnatias, pasi lojtari me shumë mundësi do të largohet këtë verë drejt kampionatit turk.

sfidanti.al