Interi tashmë ka humbur mundësinë për të fituar ‘tripletën’ këtë sezon pas eliminimit nga Kupa e Italisë nga Milani. Po ashtu, edhe titulli kampion i Serisë A duket gjithnjë e më i largët, pas shkëputjes me tri 3 pikë nga Napoli, me vetëm katër ndeshje për t’u luajtur deri në fund. I fundit që arriti të fitojë tri kompeticione në një sezon me Interin ishte presidenti Massimo Moratti, i cili ka folur sot për Radio Kiss Kiss.

“Ditën e ‘tripletës’ isha i entuziazmuar, ajo ndjesi ishte ndryshe nga ajo që kisha pritur, arritëm një rezultat që mendonim se do të ishte më i vështirë. Pasi fiton, duhet të mendosh për atë që vjen pas. Arritja e të pamundshmes të gëzon pa masë,” tha Moratti.

Moratti foli edhe për luftën për titull këtë vit midis Interit të tij dhe Napolit. “Kush do ta fitojë titullin? Ajo që më bëri përshtypje ishte se ende po flisnin për ‘tripletën’. Në kohën time, kurrë nuk u përmend ‘tripleta’ para se ta fitonim. Kur e fituam, e kuptuam që ishte ‘tripletë’. Nuk ishte një obsesion. Humbja në Kupë na shkaktoi zhgënjim. Interi ka pasur një konfuzion që lidhet me objektivat. Jemi pak të lodhur, mendoj se Napoli ka mundësi më të mëdha, gjithçka është e lidhur me Conte-n.”

Moratti ka reflektuar mbi ndjesitë dhe pasojat që ka pasur fitorja e ‘tripletës’ për klubin dhe ekipin, duke theksuar se ajo ishte një arritje historike, por gjithashtu një sfidë e vështirë për të menaxhuar pas saj.

sfidanti.al