Tirana dhe Partizani do të përballen të hënën në “Arena e Demave”, në orën 20:00 në derbin e katërt të këtij sezoni, i cili është i 177-i në historinë mes dy klubeve. Kjo ndeshje i gjen skuadrat në situata krejtësisht të ndryshme, me “Demat” që pozicionohen në vendin e katërt dhe bardheblutë të dhjetët.
Diferenca mes ekipeve është 15 pikë. Partizani ka dy vite e 4 muaj që nuk njeh humbje në derbi, me Tiranën që për herë të fundit triumfonte më 2 dhjetor 2022 me shifrat 0-2. Në 10 ndeshje të luajtura nga hera e fundit që fituan bardheblutë, janë koleksionuar 5 barazime dhe 5 fitore të Partizanit.
177 takime janë luajtur deri tani mes Partizanit dhe Tiranës në periudhën 1947-2024 në të gjitha kompeticionet. Partizani ka fituar 73 ndeshje, ndërsa bardheblutë 47. 57 ndeshje të tjera janë mbyllur në barazim. Edhe tri derbet e fundit përfunduan 0-0 (dy) dhe 1-1.
237 gola ka shënuar Partizani, ndërsa Tirana 189. Goli i fundit në derbi për Partizanin është shënuar nga Sembene me një goditje me kokë në minutën e 90- të. Në anën tjetër shënonte Emanuel Ernest, por nuk mjaftonte.
Takimi i parë historik mes Tiranës dhe Partizanit është luajtur më 30 mars 1947. “Demat e Kuq” fituan 8-0, duke sigluar kështu edhe fitoren më të thellë deri më tani në derbi. 38 vite më vonë, më 22 shtator 1985, Tirana do t’i kthente reston Partizanit, duke e mundur 7-3, në një ndeshje që mbahet mend nga tifozët e të dyja skuadrave për lojën e bukur dhe batutën për “ndryshimin” e orarit të punës. Rezultati më i thellë i sezoneve të fundit është ai 28 shkurtit të vitit 2020, kur bardheblutë fitonin me shifrat 5-1. Ndërsa më 1 mars 2008, kur të kuqtë drejtoheshin nga Hasan Lika, fitonin në “Qemal Stafa” me shifrat 4-1. Interesant është fakti se nga viti 2006 deri në 2025, janë luajtur 51 ndeshje për llogari të Superiores dhe Partizani ka fituar 22 prej tyre. Në barazim kanë përfunduar 21 ndeshje, ndërsa 8 herë ka triumfuar Tirana. Dukshëm, “Demat” kanë dominuar kryeqytetin.
Portieri i Partizanit, Pano Qirko, ka një të shkuar me klubin bardheblu. E njëjta gjë vlen edhe për drejtorin Arbër Abilaliaj dhe ndihmëstrajnerin Reinaldo Kalari. Të dy kanë luajtur me Tiranën në periudha të ndryshme. Sa i përket Tiranës, duke qenë se janë riformatuar si skuadër në sezonin e fundit, asnjë nga lojtarët aktualë nuk regjistron një të shkuar si profesionist me Partizanin. E veçanta e kësaj përballjeje është fakti se trajneri i Tiranës, Bledi Shkëmbi, ka qenë lojtari i Partizanit dhe ka shënuar në ndeshjen më të thellë që të kuqtë kanë fituar 20 vitet e fundit me bardheblutë, atë 4-1 në “Qemal Stafa”.
sfidanti.al
