Dihet se rekordet vendosen për t’u thyer, dhe kjo ka ndodhur gjithmonë, edhe pse ka nga ata rekorde që mbeten shumë gjatë në fuqi. Gjithsesi, përsa i përket golshënuesit më të ri të Bajernit në Bundesligë dhe në të gjitha konkurrimet, “steka” është ngritur vazhdimisht. Matis Tel u bë rekordmeni pasi shënoi në kampionat ndaj Shtutgartit, duke qenë në moshën 17 vjeç e 136 ditë. Ai la pas me 69 ditë rekordin e Xhamal Musialës vendosur pak kohë më parë. Sulmuesi francez, i marrë për 30 milionë euro nga Rena, u bë më i riu shënues i Bajernit në çdo garë kur realizoi ndaj Viktorias së Këlnit në Kupën e Gjermanisë në moshën 17 vjeç e 127 ditë. Tel është shumë më i shpejtë se legjendat më të mëdha të klubit si Bekenbaer (18 vjeç, 8 muaj, 26 ditë), Uli Hënes (18 vjeç, 9 muaj, 29 ditë), Karl-Hajnc Rumenige (18 vjeç, 11 muaj, 13 ditë) apo Gerd Myler (18 vjeç, 11 muaj, 15 ditë).

Sfidanti.al