Një revolucion duhet të ketë ndodhur në ligën më të fortë të basketbollit të botës, dhe askush nuk merret vesh se kush “urdhëron”. Los Anxhelos Lejkërsat, kampionët në fuqi, e humbën derbin me Klipersat në ndeshjen e parë, pastaj Bruklin Netsat shkëlqyen dy herë radhazi me Kevin Durantin e Kajri Irvingun, por ja ku vjen “ditë e re, nafakë e re”. Klipersat pësuan disfatën më të rëndë në historinë e tyre në fushën e Dallasit, madje në pushim, në tabelë, ishte shkruar rezultati më i thellë i historisë moderne të NBA-së, që nga 1950-ta e deri më sot.

Dallasi ishte në avantazh 77-27 (!!!), ndërsa gjithë ndeshjen e fitoi 124-73! Luka Donçiç shkëlqeu me 24 pikë, por që të gjithë Maveriksat ishin të fortë, ndërsa Klipersave u mungoi më i miri, Kauai Leonard. Donçiç pati edhe 9 topa në tabela e 8 asistë. Kjo nuk do të thotë se Dallasi është tepër i fortë, sepse u mund thellë nga Lejkërsat në ndeshjen e kaluar. Po ashtu, Bruklin Netsat pësuan papritur humbje, edhe pse vetëm me 2 pikë 104-106, në fushën e Sharlotës. Duranti shënoi 29 pikë dhe Irvingu 25, por nuk mjaftuan. Katastrofë edhe për Miluokin megjithë lojën e mirë të Janis Antetokumbos. Ylli i NBA-së shënoi 27 pikë e kapi 13 topa në tabela, por humbja ishte e thellë, 110-130 ndaj Nju Jork Niksave. Fitore ndërkaq për Lejkërsat, 127-91 ndaj Minesotës, me 18 pikë e 9 topa në tabela për Lebron Xhejmsin që luajti vetëm 3 pjesë loje, ndërsa Entoni Dejvis mungoi për shkak dëmtimi.

Sfidanti.al