Nëse gjyqtari Xhaja do të kishte pasur mendim tjetër, atëherë kampionët mund të kishin dalë fitues, por kjo nuk ndodhi dhe asnjëra nga skuadrat nuk e shënoi dot qoftë edhe një gol. Përfundoi barazim 0-0 derbi kryeqytetas në “Arenën Air Albania”, ku përveç mungesës së tifozëve, ndeshjen e prishi fusha tepër e dëmtuar e impiantit kryesor të Shqipërisë.

Partizani luajti më mirë në pjesën e parë, dhe Tirana pas pushimit, ndërsa fillimisht Danso e pastaj Muçi pretenduan për 11-metërsha. Protesta të logjikshme pasi duket se ka pasur kontakt në zonë, sidomos rasti i dytë kur ndaj Muçit u ndërhy, topi kaloi ndërsa këmba e mbrojtësit të kuq ndaloi sulmuesin bardheblu. Fillimisht rrezikoi Kardoso për Partizanin, kur gaboi portieri Bekaj, pastaj aksion i miqve me Malën dhe Solomonin, por sidomos rasti i Bardhit në 26’, topi i të cilit u ndal nga Bekaj.

Pas pushimit rolet ndryshuan dhe fillimisht Danso kërkoi penallti. Më pas, aksione të të dyja skuadrave me Bardhin dhe Torasën, ndërsa në 55’, u desh sërish Bekaj që të ndalonte një gol të të kuqve, pas aksionit të Bardhit me Kardoson. Në 30 minutat e fundit në fushë ishte thuajse vetëm Tirana, me Muçin që u bë disa herë protagonist, sidomos në 80’ kur nuk arriti të gjuante. Një minutë para fundit të kohës së rregullt, Muçi u rrëzua në zonë në duel me Asanin, por gjyqtari Xhaja nuk dha penallti. Kampionët e mbyllën në sulm, duke luajtur ndoshta ndeshjen më të mirë të sezonit pikërisht në derbi, por pa mundur të marrin fitoren. Partizani ka 11 pikë në 6 javë, ndërsa Tirana 6 pikë.

Sfidanti.al