Largimi pritej që në gusht. Ernest Muçi ka qenë prej kohës një diamant në vitrinë për Tiranën, por duket se klubi dhe vetë ai kanë pritur rastin e duhur. Zbulimi ndoshta më i rëndësishëm i Superligës shqiptare 12 muajt e fundit me gjasë do ta hedhë hapin e radhës dhe karrierën ta vazhdojë në Austri. Burime pranë klubit kryeqytetas bëjnë me dijë se 19-vjeçari pëlqehet nga Rapidi i Vjenës, një nga emrat më të shquar të futbollit austriak, dhe flitet se shifra e ofruar për kartonin mund të jetë 400 000 euro. Vetë Muçi nuk deshi të fliste për të ardhmen.

“As unë, as agjenti im, nuk e dimë se çfarë do të ndodhë, dhe se ku do të shkojmë, apo nëse do të largohemi nga Tirana, – tha ai, – për momentin, duhet të luaj e të shënoj gola në kampionat”. Edhe pse 19 vjeç, Muçi u dallua gjatë 12 muajve të fundit duke ndihmuar Tiranën në titullin e fituar në Superligë, duke shënuar gola të rëndësishëm sidomos në ndeshjet derbi ndaj Partizanit. Ai shkëlqeu edhe në Champions, në ndeshjet ndaj Dinamos së Tbilisit dhe Crvena Zvezdës, ndërsa fillimisht u mendua se do të shkonte në Belgjikë.

Tirana ndoshta dëshironte edhe më shumë për kartonin e tij, por duket se vetë vlera e Superligës shqiptare është e tillë që vështirë të të japë 1 milionë euro, përveçse nëse shkëlqen në Europë apo nëse ndërmjetësojnë agjentë të rëndësishëm ndërkombëtarë.

Sfidanti.al