Seria e zezë e Fetelit, nga aksidenti në Singapor, te përplasja në Malajzi!

Çfarë po ndodh kështu? Sebastian Fetel me siguri ndihet si Mario Baloteli dhe është gati të thotë “përse më ndodh vetëm mua”. Dy javë më parë, pati përplasjen e tmerrshme me Raikonenin dhe Verstapenin në fillim të Çmimit të Madh të Singaporit, duke humbur 25 pikë nga kryesuesi i Botërorit të Formula 1, Ljuis Hamilton. Pastaj erdhën provat zyrtare në Malajzi, ku ndërroi motorin (në garë ishte me motorin e pestë) dhe u nis nga vendi i fundit. Fitoi 16 vende dhe doli i katërti (gomat nuk e lejuan për më shumë), duke zvogëluar disi dëmet me kryesuesin anglez, që tani është 34 pikë përpara. Gjithsesi, nuk ishte e thënë që Fetel të binte rehat.

Me të përfunduar gara në Malajzi, ndërsa po bënte xhiron për të shkuar në vendin e parkimit të makinës së tij Ferrari, gjermani u godit nga Lens Stroll. Fetel u detyrua të kthehej tek skuadra hipur mbi makinën e Paskal Verlainit, por shqetësimi nuk ishte sesi do të mbërrinte atje, por çfarë do të ndodhë në garën e ardhshme. Mundet që Ferrari i Fetelit të ketë nevojë për ndërrimin e paketës së këmbimit të marsheve (kambios) dhe nëse ndodh kjo, ai do të dënohet me -5 vende në Çmimin e Madh të Japonisë.

Sfidanti.al