Gjykata e Parisit ka dënuar me 9 vite burg dhe 80 mijë euro gjobë Ilyas Kherbouch, 21 vjeç, i konsideruar organizatori kryesor i grabitjes së portierit Gianluigi Donnarumma dhe partneres së tij, Alessia Elefante, në Paris më 21 korrik 2023. Grabitësit hynë në apartamentin e çiftit në zonën e Avenue Montaigne, pasi u ngjitën në çati me një shkallë dhe më pas hynë nga dritarja. Në atë kohë, Donnarumma ishte portier i PSG-së.

Futbollisti u godit në fytyrë dhe u kërcënua me thikë, ndërsa partnerja e tij u detyrua t’u tregonte autorëve vendndodhjen e kasafortës. Dhuna ndaj saj vazhdoi edhe pasi ajo u tha se ishte shtatzënë. Sipas dëshmisë së saj, ajo u godit dhe u shtrëngua në fyt me kabllon e karikimit të një telefoni. Disa ditë pas grabitjes, Elefante pësoi një abort spontan. Gjatë procesit gjyqësor u vlerësua se trauma e shkaktuar nga ngjarja mund të kishte ndikuar në humbjen e shtatzënisë, por gjykata nuk përcaktoi një lidhje të sigurt shkakësore.

Grabitësit morën nga apartamenti sende me vlerë rreth 500 mijë euro. Përveç Kherbouch, Khyan M., 22 vjeç, i akuzuar se kishte organizuar operacionin nga burgu dhe u kishte dhënë udhëzime autorëve përmes telefonit, u shpall i pafajshëm. Ndërkohë, Moktar D., i akuzuar se kishte ndihmuar në përgatitjen e grabitjes, u dënua me 5 vite burg.