Ishte një nga kandidatët kryesorë për pankinën e Kosovës, por zgjedh të firmosë në Rusi. Roberto Moreno, ish-ndihmësi i Luis Enriques te Barcelona, Celta Vigo, Roma dhe kombëtarja e Spanjës, ishte i preferuari i FFK-së. Madje presidenti Agim Ademi pati një takim me 46-vjeçarin spanjoll në Stamboll, por ky i fundit ka pranuar ofertën e Sochit, klubit që mbyll renditjen në elitën e futbollit rus.

Shtypi iberik shkruan se Moreno, i cili kërkohej edhe nga turqit e Adana Demirspor, ka firmosur me klubin rus. Dhe së shpejti do të prezantohet si trajneri i katërt gjatë këtij edicioni. Gjatë karrierës si trajner ka drejtuar edhe Granadën në La Liga dhe Monacon në Ligue. Por edhe Spanjën për një periudhë të shkurtër pas tërheqjes së përkohshme të Luis Enriques pas vdekjes së vajzës. AS shkruan se Moreno do të jetë pjesë e Sochit deri në vitin 2025, ndërkohë që drejtuesit e Federatës dardane duhet të shohin për alternativa të tjera për pasuesin e Primoz Glihas në stolin e ekipit përfaqësues.

sfidanti.al