Sporti tradicionalisht ofron histori që pakkush mund t’i imagjinojë. Dhe një e tillë, tani një fabul moderne, u tregua nga lojtarët e Mjällby, të cilët përfunduan performancën e tyre të jashtëzakonshme në ligën suedeze të hënën. Një sezon që nuk do të harrohet kurrë dhe është bërë tashmë pjesë e historisë së futbollit, duke pasur parasysh se kampionët e rinj suedezë banojnë në një qytet me vetëm 1,400 banorë.

Një nga arkitektët kryesorë të asaj që është quajtur Leicesteri suedez është trajneri Anders Torstensson, historia e të cilit është po aq e pabesueshme duke pasur parasysh se ai ka luftuar një betejë shumë më të vështirë jashtë fushës për muaj të tërë.

Në gusht të vitit 2024, Torstensson mori një lajm shkatërrues, u diagnostikua me leuçemi. “Që atëherë, jam ndjerë edhe më i fortë sepse e kam kuptuar rëndësinë e jetës. Rëndësinë e çdo dite këtu”, rrëfeu 59-vjeçari. “Sot, nuk ndihem ndryshe nga kur nuk dija për sëmundjen. Në një farë mënyre, po e lë diagnozën në spital. E kam pranuar dhe nuk është diçka që më prek thellë”.

Nga ana tjetër, sëmundja i mësoi diçka: “Nuk e marr asgjë si të mirëqenë dhe nuk i shtyj gjërat për nesër. Kjo është edhe arsyeja pse fituam. Të gjithë na pyesin për sekretet tona, por nuk ka asnjë. Ka rreth 500 gjëra për të cilat kemi punuar çdo ditë, me një përpikmëri të jashtëzakonshme. Dhe nuk kemi bërë kurrë kompromis për asgjë”.