Ardian Ismajli po kalon një nga momentet më të vështira në karrierën e tij. Mbrojtësi i Kombëtares shqiptare po përballet me një periudhë të zymtë, pasi prej më shumë se dy muajsh nuk ka mundur të jetë në dispozicion të Empolit për shkak të dëmtimeve të njëpasnjëshme. Pas një fillimi solid të sezonit, ku u shfaq si një pikë kyçe në repartin defensiv të skuadrës toskane, Ismajli nisi të përballej me probleme fizike që i kanë ndaluar vazhdimësinë. Dëmtimi i fundit, që sipas klubit ka ardhur gjatë grumbullimit me Kombëtaren shqiptare, ka shtuar dyshimet dhe polemikat në kampin italian për mënyrën se si është menaxhuar gjendja e tij fizike.

Në ndeshjet e fundit me Shqipërinë, Ismajli qëndroi në stol pa u aktivizuar, çka lë të kuptohet se nuk ishte në formë optimale. Megjithatë, kthimi i tij në klub është shoqëruar me një vendim drastik: përjashtimi i tij nga lista e lojtarëve të grumbulluar, duke u ulur në tribunë dhe jo më në pankinë.

Një mesazh i qartë nga drejtuesit e Empolit, që e konsideruan atë të papërshtatshëm për të dhënë kontribut dhe madje nënkuptuan se lojtari duhet të kishte qenë më i kujdesshëm me gjendjen e tij fizike. Situata ka marrë një tjetër dimension pas deklaratës së trajnerit të Empolit, Roberto d’Aversa, i cili pas humbjes së thellë 0-3 përballë Bolonjës në Kupën e Italisë, u pyet për mungesën e Ismajlit. Përgjigjja e tij ishte e ftohtë dhe e prerë:

“Për këtë pyetje nuk do të dija si t’i përgjigjesha. Ai problemin e parë e kishte më 2 shkurt. Përgjigjet duhet t’i japë mjeku. Ka pasur vështirësi në rikthim dhe është kthyer i dëmtuar nga Kombëtarja. Nuk është në kompetencën time të gjykoj menaxhimin që i është bërë atje. Është një lojtar i rëndësishëm që na mungon, por duhet të fokusohemi në të tashmen dhe te lojtarët që kemi në dispozicion”, tha trajneri.

sfidanti.al