Jude Bellingham u shfaq përlotur pasi u detyrua të largohej nga fusha gjatë ndeshjes së La Ligës mes Real Madrid dhe Rayo Vallecanos, për shkak të një dëmtimi në muskulin e pasmë të këmbës. Mesfushori anglez, 22 vjeç, u zëvendësua në pjesën e parë nga Brahim Diaz, ndërsa u pa duke kapur pjesën e pasme të këmbës dhe duke fshirë lotët, teksa dhimbja e detyroi të lëshonte edhe britma. Situata ka shqetësuar trajnerin e Anglisë, Thomas Tuchel, pasi dëmtimi mund ta mbajë jashtë fushës për një periudhë të gjatë, duke rrezikuar pjesëmarrjen e Bellingham në Botërorin që nis më 17 qershor, ku Anglia do të përballet me Kroacinë, Ghanën dhe Panamën në fazën e grupeve. Edhe trajneri i Real Madrid, Alvaro Arbeloa, nuk dha lajme pozitive pas ndeshjes, duke deklaruar: “Ende nuk dimë asgjë për Bellingham.” Situata mbetet shqetësuese për Tuchel dhe tifozët e Tre Luanëve, ndërsa mesfushori kryesor mund të humbasë një nga turnetë më të rëndësishëm të karrierës së tij.

sfidanti.al