Paris Saint-Germain dhe Luis Campos do të vazhdojnë rrugëtimin e tyre së bashku. Sipas asaj që raporton prestigjiozja franceze ‘L’Équipe’, klubi parizien ka arritur një marrëveshje për rinovimin e kontratës me këshilltarin sportiv portugez, i cili ka qenë arkitekti kryesor i skuadrës kampione të Francës dhe finaliste e Ligës së Kampionëve. Zyrtarizimi i marrëveshjes pritet të bëhet publik para finales së Kupës së Francës kundër Monaco-s, si sinjal force dhe stabiliteti institucional nga drejtuesit e klubit.

Pas javësh të tëra spekulimesh dhe tratativash, presidenti Nasser Al-Khelaïfi dhe Campos kanë gjetur gjuhën e përbashkët për të vijuar bashkëpunimin në një projekt afatgjatë. Luis Campos, i njohur për punën e tij të suksesshme në klube si Lille dhe Monaco, ka luajtur një rol kyç në transformimin e PSG-së në një skuadër më të balancuar, më pak të bazuar te ‘yjet’ dhe më shumë te ndërtimi i një grupi të fortë e të disiplinuar. Me blerje strategjike dhe një vizion të qartë teknik, ai ka ndihmuar klubin të rikthehet në elitën e futbollit evropian.

Rinovimi i kontratës së Campos, që sipas medieve franceze do të zgjasë përtej vitit 2028, është gjithashtu një sinjal i qartë nga PSG se dëshiron të vazhdojë në të njëjtin drejtim, me stabilitet dhe kontinuitet në strukturat drejtuese. Zërat për një largim të mundshëm të Campos tashmë janë shuar dhe klubi ka zgjedhur të forcojë një projekt që ka sjellë rezultate konkrete. Me këtë lëvizje, PSG i jep besim dhe qetësi ambientit përpara sfidës vendimtare në finale dhe, në të njëjtën kohë, vendos themelet për të ardhmen e afërt në nivel sportiv dhe institucional.

sfidanti.al