Raquel Candia, partnere e ish-futbollistit Fernando Cáceres, vdiq të hënën pasi ra nga kati i shtatë i banesës që ndante me ish-lojtarin e klubeve spanjolle si Real Zaragoza, Valencia dhe Celta de Vigo, si dhe të klubeve argjentinase Argentinos Juniors dhe River Plate. Sipas ‘Telefe Noticias’, Candia, partnere e Cáceres që nga viti 2009, ra në oborrin e brendshëm të ndërtesës. Burimet policore raportuan se Cáceres ishte i vetmi person që ndodhej në banesë së bashku me Candian në momentin e ngjarjes. Familja e viktimës e ka akuzuar ish-futbollistin si përgjegjës për vdekjen e saj. Në një deklaratë për gazetën ‘Clarín’, një nga vëllezërit e viktimës zbuloi se marrëdhënia mes tyre kishte qenë “mjaft agresive nga ana e Cáceres” dhe e akuzoi atë për dhunë. “Ai e mbante të izoluar dhe nuk e linte të dilte. Gjithmonë e kontrollonte dhe nuk e linte të kalonte një të diel me familjen,” tha ai. Policia e Buenos Airesit po heton për të sqaruar rrethanat e ngjarjes dhe nuk ka përjashtuar ende asnjë hipotezë për vdekjen e Candias. “Po punojmë në vendngjarje dhe nuk kemi asnjë provë që përfshin një person të tretë,” deklaruan hetuesit. Autopsia e viktimës është planifikuar të kryhet të martën.

Hipotezat që po shqyrtohen për momentin përfshijnë një akt të mundshëm feminicidi, vetëvrasjeje ose aksidenti. Rezultatet e autopsisë do të jenë vendimtare për të vazhduar hetimet në cilëndo nga këto pista. “Është ende shumë herët për të arritur në përfundime,” theksuan autoritetet. Fernando Cáceres zhvilloi një pjesë të rëndësishme të karrierës së tij në Spanjë. Pas debutimit me Argentinos Juniors, ai kaloi te Real Zaragoza në vitin 1993, ku fitoi Kupën e Mbretit në vitin 1994. Pas një sezoni me Valencian (1997-98), ai luajti për Celta Vigon, me të cilën fitoi Kupën Intertoto në vitin 2000.

sfidanti.al