Kylian Mbappe zhvilloi një sezon mbresëlënës në aspektin individual, por sërish nuk arriti të fitonte “Topin e Artë 2026”. Sulmuesi francez u rendit i dyti, pas anglezit Harry Kane, ndërsa mediat spanjolle kanë analizuar arsyet që ndikuan në këtë rezultat. Sipas gazetës “Marca”, faktori vendimtar ishte mungesa e trofeve madhorë me Real Madridin. Pavarësisht se përfundoi si golashënuesi më i mirë në La Liga dhe Champions League, Mbappe nuk arriti t’i shoqëronte statistikat e jashtëzakonshme me suksesin kolektiv.

Gazeta spanjolle vë në dukje se fituesit e fundit të çmimit, Rodri, Ousmane Dembélé dhe Harry Kane, kanë një element të përbashkët: kontributin në arritjet e skuadrave të tyre. Rodri u shpërblye pas sukseseve me Manchester Cityn dhe triumfit të Spanjës në Kampionatin Evropian, ndërsa Dembélé u vlerësua për rolin e tij në fitoret e Paris Saint-Germainit. Në rastin e Kane, paraqitjet individuale u shoqëruan me trofe të rëndësishëm me Bayern Munich. Sipas “Marcas”, këto raste tregojnë se golat dhe statistikat nuk janë gjithmonë të mjaftueshme për të fituar çmimin më prestigjioz individual në futboll. Mbappe e ka pasur prej kohësh “Topin e Artë” si një nga objektivat kryesorë të karrierës.

Francezi ishte ndër pretendentët edhe në të kaluarën, por ende nuk ka arritur ta fitojë këtë trofe. Tashmë, te Real Madridi, sfida e tij është të kthehet në protagonist të sukseseve të mëdha të skuadrës. Fitimi i La Ligës ose Champions League mund t’i forcojë ndjeshëm kandidaturat në edicionet e ardhshme. Mesazhi i analizës së “Marcas” është i qartë: Mbappe mund të vazhdojë të shënojë gola me ritëm të jashtëzakonshëm, por për të triumfuar në garën për “Topin e Artë”, do t’i duhet të fitojë edhe trofe të rëndësishëm me Real Madridin.