Sulmuesi polak i Barcelonës, Robert Lewandowski, mund të vazhdojë karrierën në Shtetet e Bashkuara, me Chicago Fire që ka shfaqur një interes të fortë për ta transferuar 37-vjeçarin në verën e ardhshme. Sipas BBC, kontaktet mes palëve janë zhvilluar në një klimë pozitive, ndërsa vetë Lewandowski është i hapur ndaj mundësisë për të luajtur në MLS. Kontrata e tij me Barcelonën përfundon në fund të këtij sezoni, gjë që i lejon atij të negociojë lirshëm me çdo klub.

Chicago Fire e ka identifikuar Lewandowskin si objektivin kryesor të merkatos, duke e konsideruar lojtarin si një element që mund të rrisë nivelin e klubit dhe të sjellë përfitime edhe nga ana komerciale, pasi qyteti ka komunitetin më të madh polak në SHBA. Klubi është gati të bëjë një investim të konsiderueshëm financiar për të, duke e integruar në skuadër dhe duke përfituar nga aspekti marketing.

Një avantazh shtesë për Chicago është rregulli i MLS-së “discovery list”, që i jep prioritet klubit për të negociuar me Lewandowskin para çdo konkurrenti tjetër. Inter Miami gjithashtu është përmendur si një destinacion i mundshëm, por nuk mund të negociojë me sulmuesin derisa ai të mbetet në këtë listë.

Që nga transferimi i tij te Barcelona në vitin 2022, Lewandowski ka shënuar 109 gola në 164 ndeshje dhe ka fituar tituj të ndryshëm, përfshirë dy tituj të LaLiga-s, duke u mbajtur si një nga liderët kryesorë të ekipit katalanas. Me eksperiencën dhe golat e tij, 37-vjeçari mund të sjellë ndikim të menjëhershëm në MLS dhe të forcojë pozicionin e Chicago Fire në kampionat.

sfidanti.al