E ardhmja e José Mourinhos ka nisur të lidhet sërish me Real Madridin. Trajneri portugez, aktualisht në krye të Benficës, nuk e përjashton mundësinë e një rikthimi në “Santiago Bernabéu”, falë një klauzole të veçantë në kontratën e tij. Sipas raportimeve të “Diario AS”, edhe pse marrëveshja e Mourinhos me Benficën është e vlefshme deri në qershor 2027, ajo përmban një mekanizëm që i lejon trajnerit të ndërpresë kontratën pa kompensim financiar, nëse brenda dhjetë ditëve nga ndeshja e fundit e sezonit bindet nga një ofertë tjetër. Përballja mes Benficës dhe Real Madridit në “Estádio da Luz”, në kuadër të “play-off”-it të UEFA Champions League, ka rindezur spekulimet për një rikthim të mundshëm të teknikut nga Setúbal në “Chamartín”.

Në parim, Mourinho dëshiron të vazhdojë projektin me Benficën, por një telefonatë nga drejtuesit madrilenë mund të ndryshojë skenarin. Gjithçka do të varet edhe nga ecuria e sezonit për “Los Blancos”. Nëse Real Madridi mbyll sezonin me trofe ose me një garë të fortë deri në fund, është e mundshme që drejtimi t’i besohet sërish Álvaro Arbeloa. Në të kundërt, rikthimi i Mourinhos mund të shndërrohet në një opsion konkret për verën e ardhshme.