Real Madridi ka qenë shumë aktiv në merkato gjatë kësaj vere dhe kjo do të vazhdojë edhe pasi të përfundojnë angazhimet në Kupën e Botës për Klube, ku është kualifikuar në çerekfinale. Pritet që Alvaro Carreras t’i bashkohet emrave si Dean Huijsen, Trent Alexander-Arnold dhe Franco Mastantuono në skuadrën e Xabi Alonsos, por do të ketë edhe largime lojtarësh. Luka Modric dhe Lucas Vazquez do të largohen pas skadimit të kontratave të tyre në fund të Kupës së Botës për Klube dhe atyre mund t’i bashkohet edhe Rodrygo, i cili është lidhur fort me një kalim tek Arsenali. Një tjetër lojtar i skuadrës së parë që mund të largohet nga Real Madrid në javët e ardhshme është Gonzalo Garcia. Gonzalo ka qenë një surprizë për Real Madridin në Shtetet e Bashkuara, duke shënuar në tre nga katër ndeshjet e skuadrës deri tani. Kjo ka bërë që klube të ndryshme të shfaqin interes për ta transferuar dhe sipas gazetës katalanase “Sport”, një prej tyre është Chelsea. Në vitet e fundit Chelsea ka synuar të blejë lojtarë të rinj dhe Gonzalo është një prej talentëve spanjollë që ata po ndjekin me vëmendje. Mesfushori i Barcelonës, Marc Casado, është lidhur gjithashtu me një kalim në Londrën Perëndimore, po ashtu edhe shoku i tij i skuadrës, Fermin Lopez. Në rastin e Gonzalos, raportohet se Chelsea do të ishte e gatshme të paguante 40 milionë euro për ta transferuar këtë verë nga Real Madridi. 21-vjeçari ka një klauzolë lirimi prej 50 milionë eurosh, por pritet që të jetë në dispozicion për një çmim më të ulët se kjo shifër.

sfidanti.al