Mund të duket shumë e çuditshme për të qenë e vërtetë, por jeta e Youssoufa Moukoko mund të jetë e mbushur me intriga. Joseph Moukoko, i cili deri më tani njihej si babai i lojtarit 20-vjeçar, deklaroi nën betim se nuk është babai biologjik i futbollistit. Sipas një dokumenti në posedim të gazetës gjermane ‘Bild’, Joseph deklaroi gjithashtu se data e regjistruar e lindjes së Moukoko-s nuk është e vërtetë:

“I vetëdijshëm për ndëshkimin në rast të një deklarate të rreme, deklaroj nën betim: Youssoufa Moukoko nuk është djali im biologjik dhe as i gruas sime, Marie Moukoko. Ai gjithashtu nuk ka lindur më 20 nëntor 2004 në Yaoundé, Kamerun.”

Kjo deklaratë kundërshton tërësisht versionin zyrtar që ka mbështetur karrierën e ‘yllit’ të ri, i cili aktualisht është i huazuar nga Borussia Dortmundi te Nice. Joseph Moukoko, në një dokumentar të transmetuar nga televizioni ProSieben, pranoi se kishte manipuluar dokumentet zyrtare për të ndryshuar moshën e Youssoufa-s. Ai tregoi se kishte siguruar një certifikatë të rreme lindjeje në Kamerun dhe gjithashtu një pasaportë që e përshkruante atë si djalin e tij: “Në të vërtetë, ai ka lindur më 19 korrik 2000. Ne e bëmë atë katër vjet më të ri. Tani ai është i regjistruar sikur të ketë lindur më 20 nëntor 2004.”Këto zbulime lidhen me hetimet e kryera nga ‘Bild’ në Kamerun, ku nuk u gjetën prova për lindjen e Youssoufa Moukoko në vitin 2004. Përkundrazi, dokumentet tregonin për një Youssoufa Mohamadou, i lindur më 2000, dhe i regjistruar si djali i Ousman Mohamadou, një shofer taksie. Në lagjen ku Youssoufa u rrit, disa banorë konfirmuan se babai biologjik i futbollistit ndërkombëtar gjerman jetonte në një fshat të afërt dhe jo në të njëjtin vend me Joseph Moukoko. Ndërkohë, Borussia Dortmund ka përsëritur besimin në dokumentet zyrtare gjermane që vërtetojnë identitetin dhe moshën e lojtarit, si dhe ligjshmërinë e përdorimit të tij gjatë periudhës në klubin gjerman. “Prindërit biologjikë të Youssoufa Moukoko-s përcaktohen bazuar në dokumentet zyrtare të identitetit dhe certifikatat e lindjes të lëshuara nga një autoritet gjerman. Këto dokumente mbeten të vlefshme deri më sot dhe përbëjnë bazën për autorizimet dhe licencat e lojës për klubet, si në nivel kombëtar, ashtu edhe ndërkombëtar, si dhe për kombëtaret, përfshirë ekipin gjerman U-21,” deklaroi Sascha Fligge, drejtori i komunikimit të klubit. Sulmuesi, i cili ka përfaqësuar Gjermaninë dy herë, u shpall kampion i Evropës për U-21 në vitin 2023, në një kompeticion ku luajti vetëm një ndeshje. Gjermanët mposhtën Portugalinë në finale (1-0), por Moukoko nuk u aktivizua në ndeshjen vendimtare.

sfidanti.al