Australia fitoi një nga turnetë më të vjetër të botës në sport, të quajtur “Hiri”, në anglisht “Ejshs” (Ashes). Gjuha angleze e ka në numrin shumës, një numër që në shqip nuk ka kuptim tek fjala hiri (ajo që mbetet nga djegia e diçkaje). Ky turne i përket sportit të kriketit dhe zhvillohet mes Australisë dhe Anglisë që nga viti 1882.

Ishin australianët që fituan edicionin e fundit pikërisht këto ditë, dhe e festuan si diçka familjare, sikur të ishte festa e Krishtlindjeve apo e Vitit të Ri. Në foto shikojmë Dejvid Uornerin me gruan Kandisë dhe vajzat Indi dhe Ajvi dhe me trofeun e vogël. Në foton tjetër, lojtari Usman Kauaja dhe e fejuara e tij, Rejçël Meklelan, edhe ata me trofeun, ndërsa një foto tjetër paraqet skuadrën australiane që feston trofeun e fituar në “Ejshs” ndaj Anglisë.

Trofeu quhet “urnë” (ajo enë që mban hirin) dhe për origjinën e saj thuhen histori nga më të ndryshmet dhe më legjendaret. Cilado qoftë origjina, kjo nuk i pengoi aspak australianët që të gëzonin dhe të lumturoheshin me suksesin e vështirë. Në histori janë luajtur 70 finale “Ejshs” dhe janë fituar 33 nga Australia, 32 nga Anglia dhe 5 kanë përfunduar në barazim.

Sfidanti.al