JJ Gabriel, një nga talentet më premtues të futbollit europian, është shumë pranë transferimit te Real Madridi. Sulmuesi anglez, vetëm 16 vjeç, po stërvitet aktualisht në kryeqytetin spanjoll, ndërsa palët po punojnë për të mbyllur detajet e marrëveshjes.
Sipas raportimeve të gazetarit Ben Fernandes Santos, ditët në vijim pritet të jenë vendimtare për finalizimin e transferimit, që do t’i mundësonte klubit madrilen të siguronte shërbimet e një prej perspektivave më të mëdha të kontinentit.
Në garë për futbollistin kishte qenë edhe Barcelona, e cila kishte shfaqur interes dhe kishte kërkuar informacion për të. Megjithatë, klubi katalanas është tërhequr, pasi lojtari duket se e ka marrë vendimin për të vazhduar karrierën te Real Madridi.
Gabriel kërkoi largimin nga Manchester United, ku kishte thyer disa rekorde të parakohshme për moshën e tij. Talenti anglez ka tërhequr vëmendje edhe për marrëveshjen e sponsorizimit me Nike, të firmosur kur ishte vetëm 14 vjeç, e cila sipas raportimeve ishte edhe më e madhe se ajo që kishte nënshkruar Neymar në të njëjtën moshë. Në ndeshjen e tij të fundit me fanellën e Manchester United, Gabriel realizoi një hat-trick, duke lënë edhe një tjetër dëshmi të potencialit të tij.
I prezantuar dikur në ‘Old Trafford’ së bashku me djalin e Cristiano Ronaldos, futbollisti tashmë është pranë një kapitulli të ri. Real Madridi duket se do të jetë destinacioni i radhës për një lojtar që synon të ngjitet në majat e futbollit europian.
