Romário ka reaguar në mënyrë të bujshme ndaj përplasjes mes Cristiano Ronaldos dhe trajnerit të Portugalisë, Jorge Jesus. Legjenda e futbollit brazilian dhe kampioni i botës në vitin 1994 ka dalë hapur në mbështetje të kapitenit portugez, duke thënë se vendimi i tij për t’u larguar nga grumbullimi i kombëtares ishte i kuptueshëm. Në një intervistë për “Charla Podcast”, Romário deklaroi se Ronaldo është ndier i pavlerësuar dhe pa respekt nga stafi teknik, ndaj vendosi të largohej.

“Mendoj se Ronaldo u ndie si një njeri që nuk vlerësohej dhe që nuk kishte më rëndësi. Prandaj u largua. Nëse është kështu, edhe unë do të bëja të njëjtën gjë”, u shpreh ish-sulmuesi brazilian. Por Romário nuk u ndal këtu. Me gjuhën e tij të drejtpërdrejtë dhe shpesh provokuese, ai tha se Ronaldo kishte bërë vetëm një gabim para se të largohej nga grumbullimi.

“Gabimi i Ronaldos ishte se, para se të largohej, duhej t’i kishte thënë Jorge Jesusit të shkonte në djall. Pastaj të largohej. Ky ishte gabimi i tij”, deklaroi Romário, duke përdorur një shprehje shumë më vulgare në versionin origjinal. Fjalët e ish-yllit të Brazilit kanë marrë jehonë të madhe në mediet portugeze dhe braziliane, duke e vendosur atë qartësisht në krah të Ronaldos në konfliktin që ka tronditur përfaqësuesen portugeze. Përplasja mes Ronaldos dhe Jorge Jesus shpërtheu pas vendimit të sulmuesit për të lënë grumbullimin e Portugalisë. Ronaldo ka pretenduar se trajneri nuk respektoi marrëveshjet e mëparshme për aktivizimin e tij, ndërsa situata tashmë mund të sjellë edhe pasoja disiplinore për kapitenin portugez. Ndërkohë, Romário ka dhënë një nga reagimet më të forta publike që prej nisjes së kësaj krize, duke e bërë të qartë se, sipas tij, Ronaldo kishte të drejtë të largohej.