UFC ka një mbretëreshë të re në peshën flutur. Natalia Silva është shpallur kampione pas fitores me vendim unanim ndaj kinezes Wang Cong në eventin UFC 332, të zhvilluar në Salt Lake City. Braziliania 29-vjeçare dominoi gjatë pesë raundeve dhe siguroi titullin vakant me pikët 48-47, 48-47 dhe 49-46 nga tre gjyqtarët. Për Silvën ishte fitorja e 15-të radhazi, një seri që e ngjit në majën e divizionit dhe i jep për herë të parë në karrierë brezin e kampiones së UFC-së. Fillimisht, braziliania ishte programuar të përballej me Valentina Shevchenkon, por luftëtarja nga Kirgistani u detyrua të hiqte dorë nga titulli për shkak të një dëmtimi, duke hapur rrugën për duelin mes Silvës dhe Wang. Pas triumfit, kampionia e re e cilësoi këtë vetëm si fillimin e një etape të re në karrierën e saj.

Ndërkohë, Shevchenko nuk ka ndërmend ta lërë gjatë të qetë në fron. Ish-kampionia e uroi Silvën për suksesin, por paralajmëroi se pas rikuperimit do të rikthehet për të kërkuar përsëri brezin e kampiones. Dueli Silva-Wang shënoi gjithashtu rikthimin e femrave në ndeshjen kryesore të një eventi të UFC-së pas më shumë se një viti, si dhe herën e parë që prej qershorit 2023 që dy gra kryesonin një nga eventet e mëdha të numëruara të organizatës. Mbrëmja në Salt Lake City solli edhe një nokaut të shpejtë në peshat e rënda, me brazilianin Johnny Walker që mposhti britanikun Mick Parkin me një goditje me gju në më pak se katër minuta. Megjithatë, skena kryesore i përkiste Natalia Silvës dhe brezit të saj të parë si kampione e UFC-së.