Tyson Fury dhe Anthony Joshua shkëmbyen kryesisht buzëqeshje dhe batuta miqësore kur më në fund u ngjitën së bashku në skenë për të promovuar duelin e peshave të rënda që tifozët e boksit e kanë pritur prej një dekade. Goditjet do të vijnë më 11 dhjetor në Kardif, ku dy ish-kampionët e botës do të përballen për herë të parë në një duel që po promovohet si një nga përballjet më të mëdha në historinë e boksit britanik. “Ka dhjetë vjet që po përgatitet. Ja ku jemi… Duhej të ndodhte në një moment dhe nuk ka moment më të mirë se tani”, tha Joshua gjatë konferencës për shtyp në Londër, hera e parë që të dy boksierët u panë ballë për ballë që prej njoftimit të duelit javën e kaluar. Pyetja që mbetet është nëse kjo përballje vjen shumë vonë për t’i dhënë fund debatit se kush është boksieri më i mirë. Fury është 38 vjeç dhe është rikthyer disa herë nga pensionimi, ndërsa Joshua mbush 37 vjeç pas dy javësh dhe dy ndeshjet e tij të vetme që prej humbjes ndaj Daniel Dubois për titullin botëror të IBF-së në vitin 2024 kanë qenë kundër “youtuber”-it Jake Paul dhe Kristian Prengës. “Njerëzit thonë: ‘A është shumë vonë?’… Shumë vonë. Është qershia mbi tortë”, tha Fury.

Të dy boksierët vlerësuan Turki Alalshikh, presidentin e Autoritetit të Përgjithshëm të Argëtimit të Arabisë Saudite dhe të Federatës Saudite të Boksit, për faktin se më në fund arriti ta realizonte përballjen. Alalshikh kishte dashur që dueli të zhvillohej në stadiumin “Wembley” të Londrës, por në fund u zgjodh Kardifi, pasi nuk u arrit të merrej leja që stadiumi ikonik i kryeqytetit të qëndronte i hapur deri në orën 02:00 të mëngjesit. “Në fund, Uellsi e përmbushi detyrën. Dhe, gjithsesi, është ende Mbretëria e Bashkuar”, tha Alalshikh. Shuma e shpërblimit financiar për duelin nuk është bërë publike, por mediat britanike e vlerësojnë atë në rreth 200 milionë dollarë. “Po paguhen jashtëzakonisht mirë”, deklaroi Frank Warren, promotori i ekipit të Furyt. Konferenca për shtyp u shoqërua kryesisht me buzëqeshje dhe të qeshura, ndërsa të dy shkëmbyen disa thumbime verbale për një seancë të famshme sparingu të zhvilluar më shumë se 10 vjet më parë, kur Joshua ishte ende amator.

Fury ishte ai që foli më shumë, por në përgjithësi pati fjalë të mira për rivalin e tij. “Ka qenë një model për t’u ndjekur dhe simboli i boksit britanik për vite me radhë. E gjej veten duke mbrojtur rivalin tim të përbetuar përballë tifozëve që takoj në rrugë. Thënë kjo, sigurisht që jemi këtu për të luftuar dhe do të luftojmë”, tha Fury. Joshua, nga ana tjetër, tregoi se rivaliteti mes tyre ka prekur edhe tifozët: “E di që nëpër pub-e njerëzit janë zënë seriozisht për atë se kush do të fitojë mes Tysonit dhe meje. E di që edhe familjarë janë distancuar nga njëri-tjetri për shkak të debatit se kush do të fitojë… Jam i lumtur që jam këtu, që po luftoj dhe po përmbush fatin tim para se të largohem nga kjo botë”. Fury theksoi gjithashtu kontrastin e madh fizik dhe stilistik mes të dyve: “Jam këtu sot si kampioni i botës në peshat e rënda me fizikun më të çuditshëm në historinë e këtij sporti. Jam tullac, i shëndoshë, me mjekër, i shëmtuar, i ngadaltë dhe i rëndë”. Në atë moment, Joshua e ndërpreu: “Është e vërtetë”, ndërsa Fury vazhdoi: “Dhe kemi këtë djalosh këtu. Me trup të skalitur si një olimpist, si prej mermeri. Por sa herë që e godasin në nofull, rrëzohet”.

Fjalët ishin më pak miqësore kur Fury iu drejtua Eddie Hearn, promotorit të ekipit të Joshuas. Për një moment, ai u përpoq të ndezte rivalitetin, duke u tallur me faktin se kundërshtari i tij në ring e kishte quajtur veten “pronari i shtëpisë” gjatë promovimit të duelit. “Tani ka ardhur koha të paguhet qiraja dhe unë nuk do ta paguaj. Sepse numri 1 jam unë”, deklaroi Fury. Dy boksierët diskutuan gjithashtu se përse emri i Furyt shfaqet i pari në materialet promocionale të duelit. Megjithatë, kur u përballën në skenë, asnjëherë nuk u dukën pranë një konfrontimi fizik. Përkundrazi, Fury tashmë po përgatitet ta ftojë rivalin e tij për një birrë pas duelit. “Nuk e di nëse pi, por shpresoj që pas kësaj përballjeje të mund të pimë bashkë nga një birrë Guinness. Të fitojmë, të humbasim apo të barazojmë. Fillimisht luftojmë dhe më pas pimë një birrë. Çfarë mendon?”. Joshua u përgjigj: “Nuk e di nëse mund të të besoj”.