Një lëvizje e bujshme mund të tronditë futbollin saudit. Cristiano Ronaldo dhe Gerry Cardinale, pronari i Milanit, janë pjesë e një konsorciumi prej pesë investitorësh që po përgatit një ofertë për blerjen e Al Nassr nga Fondi i Investimeve Publike të Arabisë Saudite (PIF). Përveç Ronaldos dhe Cardinales, në grup bëjnë pjesë edhe biznesmenët Ibrahim Al-Muhaidib, Mohammed Al-Khuraiji dhe Sharaf Al-Hariri. Sipas informacionit të publikuar nga analisti sportiv Nawaf_STATS dhe të raportuar edhe nga disa media italiane, secili prej pesë investitorëve duhet të angazhojë të paktën 100 milionë dollarë, rreth 92 milionë euro.

Nëse marrëveshja realizohet, Ronaldo do të kalonte nga ylli kryesor në fushë në bashkëpronar të klubit ku aktualisht luan. Një zhvillim i tillë do të përbënte një kthesë të jashtëzakonshme në karrierën e portugezit dhe një tjetër sinjal për ambiciet e mëdha të futbollit saudit. Procesi tashmë ka hyrë në një fazë vendimtare, pasi përfaqësues të RedBird Capital Partners dhe të konsorciumit pritet të takohen me drejtuesit e PIF brenda 48 orëve të ardhshme. Ky takim mund të jetë vendimtar për fatin e negociatave, me PIF që duhet të përcaktojë nëse është gati të heqë dorë nga kontrolli i Al Nassr apo nëse tentativa për blerjen e klubit do të dështojë. Në Riad, pritshmëritë janë të mëdha, ndërsa një marrëveshje e mundshme do të përbënte një nga operacionet më të bujshme të viteve të fundit në futbollin botëror.