Gjermania, Klopp e nis me Holandën

Jurgen Klop raportohet se është trajneri i ri i kombëtares së Gjermanisë, duke zëvendësuar Julian Nagelsmanin, i cili dha dorëheqjen pas eliminimit befasues të “Pancerave” nga Botërori 2026.

Nagelsmani u largua nga posti pasi Gjermania u eliminua nga Paraguai në fazën e 1/32-ave, duke u mposhtur 4-3 pas goditjeve të penalltive, ndërsa koha e rregullt dhe shtesat përfunduan në barazim 1-1.

Në mesazhin e tij të lamtumirës, ai shprehu zhgënjimin për dështimin, ndërsa u falënderua nga presidenti i Federatës Gjermane të Futbollit, Bernd Nojendorf, dhe drejtori sportiv Rudi Fëler.
Sipas mediave gjermane, Federata Gjermane e Futbollit arriti marrëveshjen me Klopin pas bisedimeve të zhvilluara gjatë fundjavës me drejtuesit e Red Bull, ku 59-vjeçari mban aktualisht postin e drejtuesit të futbollit global.
Kontrata e tij përfshin një klauzolë që i lejon të largohet për të marrë drejtimin e kombëtares gjermane. Takimi i parë mes drejtuesve të DFB-së, Klopit dhe agjentit të tij u zhvillua në Nju Jork, ndërsa vetë tekniku pranoi se ishte kontaktuar nga federata.

“Po, Juliani dha dorëheqjen dhe DFB po kërkon pasuesin e tij. Gjatë këtij procesi, më kontaktuan edhe mua. Kur u largova nga Liverpuli nuk kisha energji për të vazhduar, por tani ndihem plotësisht i rimbushur dhe gati për këtë sfidë”, deklaroi Klop.

Nëse emërimi konfirmohet, debutimi i tij në stolin e Gjermanisë do të vijë më 24 shtator në transfertë ndaj Holandës në Ligën e Kombeve, ndërsa tri ditë më vonë do të drejtojë për herë të parë “Pancerat” në shtëpi në përballjen ndaj Greqisë.

Tags: