Në shtëpinë e Juventusit kanë nisur përgatitjet për sezonin e ri, por ndërkohë ka disa çështje, duke nisur nga ajo e Federico Chiesa-s. Vjen nga një sezon i komplikuar dhe nga një europian për t’u harruar. Sulmuesi i krahut kontrata e të cilit skadon në 2025 gjendet përballë 3 alternativave te bardhezinjtë; të rinovojë me ulje page me Juventusin, të qëndrojë si një i divorcuar në shtëpi, ose të lërë Torinon.

Në gjurmët e tij javët e kaluara ishte vënë Roma, por ditët e fundit verdhëkuqtë kanë bërë hapa pas, duke lënë gjithçka. Lëvizje që ka komplikuar planet e Giuntoli dhe të lojtarit. I vlerësuar rreth 25 milionë euro Chiesa duhet të vlerësojë me kujdes zgjedhjet e ardhshme, pasi ekziston rreziku që nëse qëndron në Torino të jetë jashtë projektit në pritje që t’i skadojë kontrata duke kaluar më shumë kohë në stol se sa në fushë. Një hipotezë që të dyja palët duan ta evitojnë. Opsioni i parë është një rinovim i kontratës me Juven, por me ulje të pagës, një zgjedhje që nuk pranohet nga futbollisti i cili ësshtë i hapur për shitjet te blerësi më i mirë, ose me një shkëmbim, ndoshta me Sanchon te United. Për momentin Chiesa preferon më shumë një eksperiencë jashtë me mundësinë për të luajtur Championsin se sa një ekip brenda Italisë.

sfidanti.al