Shifrat që ka arritur Red Bull dhe Maks Verstappen në botërorin 2023 të Formula 1 flasin vetë, por historia thotë se do të jetë jashtëzakonisht vështirë për t’i tejkaluar ato. Më i vështiri nga të gjithë është rekordi i holandezit me 19 fitore nga 22 të mundshme, duke tejkaluar veten, në botërorin e kaluar me 15 fitore në 22 gara. Max siguroi 10 fitore radhazi mes Miami dhe Italisë, me të cilat kaloi 9 të Vettel-it me një tjetër Red Bull, në 2013.

Ai gjithashtu e lë pas Sebin në rekordin e më shumë fitoreve në një vit, të arritura me nisjen nga poleposition me 12 dhe në numrin e xhirove të udhëhequra prej tij në një botëror, duke thyer barrierën e njëmijë xhirove me 1,003. Ajo që holandezi arrin për herë të parë është diferenca me dyfishin e pikëve në renditje me shokun e tij të skuadrës, 575 Max dhe 285 Perez.

Dhe për ta mbyllur, 21 podiume nga 22 të mundshme. Por edhe Red Bulli si skuadër arriti shifra të jashtëzakonshme në 2023, 21 fitore nga 22 të mundshme, duke tejkaluar 19 nga 21 të Mercedes në 2016 dhe McLaren në 1988, me 15 nga 16. Dhe së fundi, ata regjistrojnë numrin maksimal të pikëve të arritura në një vit me 860, barriera e mëparshme ishte 765 e Mercedes-it në 2016.

Pyetja që shtrojnë të gjithë është nëse do të arrijë ndonjë skuadër apo pilot të thyejë këto shifra të frikshme të arritura nga red Bulli. Por, me atë që kanë arritur këtë vit Red Bulli dhe Verstapen, madje pa e evoluar makinën që nga gushti, diçka tjetër përveç një dominimi i Verstappen dhe Red Bull do të ishte një surprizë.

sfidanti.al