Nuk është një nga basketbollistët më shtatlartë të kampionatit, por kjo shpesh nuk ka rëndësi. Mos vallë ishin të tillë Majkëll Xhordan, Kobi Brajant, apo mos është i tillë Lebron Xhejmsi? E pra, me trupin 1.98 metra, Zion Uilliamson sërish është i pamundur për t’u përballuar në NBA, edhe pse ka moshën vetëm 19-vjeçare. Pas Luka Donçiçit, ja një tjetër fenomen, “prodhim vendas”, i shtohet ligës më të fortë të botës.

Ylli i ri i Nju Orlinsit shkëlqeu ndaj Portlendit duke fituar sfidën direkte ndaj yllit mik, Damian Lilardit. Uilliamson shënoi 31 pikë në më pak se 28 minuta lojë, si dhe pati 9 topa në tabela e 5 asistë. Ja pra, që ai e kupton lojën në çdo aspekt. Lilard këtë herë ishte më pak i frymëzuar, duke shënuar 20 pikë, kapur 5 topa në tabela e shërbyer 5 asistë.

Nju Orlinsi fitoi thellë 138-117, ndërsa Uilliamsonit iu deshën vetëm 9 ndeshje në NBA (me minutazh jo të plotë) që të kalonte barrierën e 30 pikëve të shënuara. Ai ishte shumë i fuqishëm dhe shumë i shpejtë, dhe asnjë mbrojtës i Portlendit nuk arriti ta ndalonte. “Unë kam kërkesa të mëdha ndaj vetes, por duhet të gjej ekulibrin mes ëndrrës dhe realitetit, – ishin fjalët e tij pas ndeshjes, – unë dua të kombinoj me shokët, dhe vetëm nëse nuk ia dal, hyj në aksion individual”.

Sfidanti.al