Bota e wrestlingut është tronditur nga lajmi i ndarjes nga jeta të Benjamin Satterley, i njohur me emrin Pac. Britaniku ndërroi jetë në moshën 40-vjeçare, kanë konfirmuar përfaqësuesit e tij. Lajmi u bë publik nga All Elite Wrestling (AEW), që shprehu dhimbjen për humbjen e sportistit. Satterley kishte nënshkruar me AEW në vitin 2019 dhe ishte një nga emrat e rëndësishëm të kompanisë. Vetëm një ditë para vdekjes, ai kishte marrë pjesë në eventin “All Out” të AEW në Çikago.

Shkaku i vdekjes nuk është bërë i ditur deri tani. I lindur në Newcastle upon Tyne të Anglisë, Satterley e nisi karrierën në wrestling në vitin 2004. Gjatë viteve, ai performoi në organizata të njohura në mbarë botën, përfshirë WWE, New Japan Pro-Wrestling dhe CMLL në Meksikë. Ai fitoi disa tituj të AEW dhe u përfshi në disa prej ndeshjeve më të paharrueshme në historinë e kompanisë. Gjatë karrierës përdori edhe emrat Adrian Neville dhe “The Man that Gravity Forgot”.

Ky i fundit lidhej me një lëvizje spektakolare, ku ai rrotullohej 360 gradë nga litari i sipërm për të goditur kundërshtarin. Lajmi i vdekjes së tij shkaktoi reagime të shumta nga emra të njohur të wrestlingut. Legjenda e WWE, Paul Heyman, e cilësoi ndarjen e tij nga jeta si “një humbje vërtet të tmerrshme”, ndërsa presidenti i AEW, Tony Khan, tha se Satterley “përcaktoi përsosmërinë” në ring dhe në jetën e tij personale. Edhe kolegët e tij, mes tyre Will Ospreay dhe Evil Uno, shprehën tronditjen për humbjen e parakohshme të 40-vjeçarit.