Sa adoleshentë sportistë mund të mburren se kanë një kontratë prestigjioze në nivel profesionist? Shumë pak. Mes tyre është një rast i jashtëzakonshëm: Vaibhav Suryavanshi, një djalë i talentuar që ka nënshkruar një kontratë të rëndësishme. Ky 13-vjeçar indian është blerë nga Rajasthan Royals (RR), një ekip që garon në Indian Premier League (IPL), kampionati më i pasur i kriketit në botë. Në botën e sportit me shkop, top dhe doreza, të gjithë flasin për këtë talent të ri premtues. Gjatë ankandit të madh për Indian Premier League, ky goditës i majtë tërhoqi vëmendjen e të gjithëve: shokëve të skuadrës, rivalëve dhe ekspertëve. Rajasthan Royals vendosi të investojë për të një shumë prej 11 milionë rupish, rreth 130,500 dollarë ose afërsisht 124 mijë euro. Me këtë ofertë, ata mposhtën konkurrencën e Delhi Capitals. Ankandi nisi me një ofertë prej 3 milionë rupish, dhe RR përfitoi nga fakti që Vaibhav ishte stërvitur me ta më parë.

Historia e Vaibhav Suryavanshi është e veçantë. Ai filloi të luante kriket që në moshën 4-vjeçare, falë babait të tij, një fermer, i cili mbolli dhe kultivoi pasionin e të birit për këtë sport. Për këtë qëllim, babai krijoi një hapësirë loje në oborrin e shtëpisë. Kur e pa talentin e lindur të djalit, ai vendosi të shiste fermën e tij për të financuar ëndrrat e Vaibhav-it. Në moshën 9-vjeçare, ai e regjistroi në një akademi kriketi në qytetin e afërt Samastipur. Nga aty, Vaibhav nisi ngjitjen e pandalshme, me synimin për të hyrë në historinë e këtij sporti.

sfidanti.al