Edon Zhegrova, i cili u prit me shumë bujë kur u transferua te Juventusi më 1 shtator, duket se po kalon një periudhë të vështirë në Torino, shkruan ‘Tuttosport’. Mes pritshmërive të larta, sulmuesi kosovar ende nuk ka arritur të shënojë apo të asistojë në asnjë nga 19 paraqitjet e tij, duke lënë mbresën e një lojtari që nuk di të konkretizojë. Në ndeshjen e fundit ndaj Galatasaray-t, Juventus udhëhoqi 3-0 dhe e çoi takimin deri në kohën shtesë. Edhe pas përjashtimit të Kelly-t me karton të kuq, Zhegrova pati mundësinë e një goli të katërt, i vetëm përballë portierit me portën gjysmë bosh, por topi përfundoi jashtë. Pas ndeshjes, ai shkoi te tifozët për të kërkuar falje, ndërsa kapiteni Manuel Locatelli e konsideroi gabimin të natyrshëm. Alessandro Del Piero komentoi: “Juventusi ishte një goditje larg një mrekullie epike”, duke iu referuar rastit të Zhegrovës. Sidoqoftë, realiteti është i pamëshirshëm: gjashtë muaj pas ardhjes në Itali, performanca e tij mbetet zhgënjyese. Transferimi prej 14.3 milionë eurosh, plus bonuse, duket deri tani i shpenzuar pa rezultat. Pritshmëritë për kreativitet dhe ndryshim të lojës tek Juventusi nuk janë përmbushur dhe Zhegrova duhet të tregojë shumë më tepër për të justifikuar besimin e dhënë. Për momentin, statistikat flasin qartë: 0 gola dhe 0 asiste, shumë lojë personale dhe ndikim minimal në skuadër.

sfidanti.al