Duket se marrëdhënia mes kapitenit të Lazios, Mattia Zaccagni, dhe influencueses së njohur italiane Chiara Nasti po kalon një tjetër moment të vështirë. Sipas mediave rozë në Itali, çifti nuk e ndjek më njëri-tjetrin në rrjetet sociale dhe prej kohësh nuk janë shfaqur së bashku publikisht. Aludimet u shtuan pas një “story” të fundit të Nasti-t, ku ajo foli për besimin, pa bërë referencë të drejtpërdrejtë për bashkëshortin. Sipas gazetarit italian Gabriele Parpiglia, Chiara ka konfirmuar se po përjeton një periudhë krize në martesën e saj – një tjetër brenda vitit të fundit.

Shtëpia luksoze në shitje

Një tjetër detaj që ka nxitur zërat është vendimi i çiftit për të nxjerrë në shitje shtëpinë e tyre në Romë. Bëhet fjalë për një vilë prej 280 metrash katrorë, e vlerësuar rreth 2.5 milionë euro, ku ata jetuan deri pak kohë më parë dhe ku familja u zgjerua me ardhjen në jetë të fëmijëve të tyre, Thiago dhe Dea. Megjithatë, sipas Parpiglia-s, Nasti ka sqaruar se bëhet fjalë për një “krizë kalimtare” dhe se vendimi për të shitur shtëpinë lidhet me faktin që në atë banesë kanë pësuar dy vjedhje, ndaj kishin vendosur të ndryshonin ambient.

E ardhmja e çiftit

Zaccagni dhe Nasti kanë qenë gjithmonë një çift shumë aktiv në rrjete sociale dhe të perceptuar si të bashkuar. Megjithatë, mungesa e paraqitjeve të përbashkëta dhe lëvizjet e fundit kanë ngritur pikëpyetje për stabilitetin e marrëdhënies së tyre. Mbetet për t’u parë nëse kjo është thjesht një periudhë e vështirë kalimtare apo një krizë më e thellë në martesën e tyre.

sfidanti.al