Thomas Tuchel ka konfirmuar se i ka kërkuar falje yllit të Real Madridit, Jude Bellingham, pas një komenti që kishte bërë për të në një intervistë. Tuchel, aktualisht trajner i Anglisë, shpalli listën më të fundit të lojtarëve për përballjet e ardhshme të “Tre Luanëve” në kuadër të kualifikueseve për Botërorin 2026.

Anglia do të luajë fillimisht ndaj Andorrës më 6 shtator në Villa Park, përpara një sfide të vështirë në transfertë kundër Serbisë më 9 shtator.

Bellingham është jashtë liste për këto ndeshje, pasi ka kryer një operacion në shpatull pas Kupës së Botës për Klube në korrik dhe pritet të rikthehet në tetor për Real Madridin dhe Anglinë.

Në kuadër të publikimit të listës, Tuchel u pyet edhe për një koment që kishte bërë më herët për sjelljen në fushë të Bellinghamit.

Në një intervistë për “Talksport”, Tuchel kishte deklaruar: “Nëse ai (Bellingham) buzëqesh, fiton zemrat e të gjithëve. Por ndonjëherë e sheh atë zemërim, atë uri dhe zjarr brenda tij që mund të duket paksa neveritës, për shembull për nënën time kur e shikon në televizor”.

Pas reagimeve të shumta, Tuchel ka kërkuar falje publikisht dhe ka treguar se ka kontaktuar menjëherë me Bellingham për të shpjeguar veten.

“Sigurisht, kam kontaktuar menjëherë me të. E përdora atë fjalë pa e menduar mirë, për ta bërë shumë të qartë. Nuk kishte ndonjë mesazh të fshehtë apo ndonjë qëllim të keq.

E kuptoj plotësisht dhe e marr përgjegjësinë për titujt që u krijuan. Më vjen keq për shqetësimin dhe për bujën që shkaktova”, ka thënë Tuchel.