Manchester United ndodhet sërish në një sezon të mbushur me pasiguri dhe rezultatet e dobëta kanë vënë në pikëpyetje të ardhmen e trajnerit portugez, Rúben Amorim. Edhe pse erdhi me shumë pritshmëri pas suksesit te Sporting Lisbona, periudha e tij në “Old Trafford” mund të përfundojë më herët se pritej.

Në Angli ka nisur të qarkullojë një emër për të marrë drejtimin e ekipit: Gareth Southgate. Ish-trajneri i Anglisë, i cili drejtoi “Tre Luanët” për tetë vite deri në largimin pas Euro 2024, shihet si kandidati kryesor për të nisur një projekt të ri te “Djajtë e Kuq”.

Kërkesa e Southgate: katër vite dhe garanci

Sipas burimeve pranë klubit, Southgate është i gatshëm të negociojë nëse United vendos të mbyllë ciklin me Amorim-in. Megjithatë, ai ka një kusht të qartë: kërkon të paktën katër vite kohë dhe garanci të plota për të ndërtuar një projekt afatgjatë.

55-vjeçari druhet se mund të pësojë të njëjtin fat si trajnerët e tjerë pas epokës së Sir Alex Ferguson, të cilët nuk patën durimin dhe besimin e klubit për të sjellë ndryshimin e madh. Ai e sheh një transformim të thellë si të vetmen mënyrë për ta rikthyer United në majën e futbollit europian.

Një profil ndryshe

Southgate njihet si një trajner më shumë menaxher grupi dhe edukator sesa taktik i pastër. Ai beson te proceset, kultura e fortë dhe ndërtimi i një ekipi të qëndrueshëm në kohë, jo te zgjidhjet e shpejta.

Një tifoz i United që nga fëmijëria

Një tjetër element që e lidh me klubin është fakti se Southgate ka qenë tifoz i Manchester United që në fëmijëri. Për të, drejtimi i këtij ekipi nuk do të ishte vetëm një sfidë profesionale, por edhe një mision personal.

Pas largimit nga Anglia, ai është përqendruar në projekte jashtë futbollit, përfshirë edhe promovimin e librit të tij “E dashur Angli: Mësime mbi lidershipin”. Vetë Southgate ka pranuar se nuk është i etur për t’u rikthyer në stolin e një ekipi, por një ofertë si ajo e United mund të jetë arsyeja për të rifilluar punën si trajner.

sfidanti.al