Garnacho shpërthen kundër Amorim-it: S’e kuptoj pse luajta vetëm 20 minuta

Alejandro Garnacho, talenti argjentinas i Manchester United, nuk e fshehu aspak zhgënjimin pas finales së UEFA Europa League, ku “Djajtë e Kuq” humbën ndaj Tottenhamit. Sulmuesi 19-vjeçar, i cili ishte titullar përgjatë pjesës më të madhe të turneut, nisi ndeshjen nga stoli dhe u aktivizua nga trajneri Ruben Amorim vetëm në minutën e 71-të. Pas ndeshjes, Garnacho u shfaq i ashpër si ndaj sezonit në përgjithësi, ashtu edhe ndaj zgjedhjeve të trajnerit portugez. “Është e vështirë për të gjithë, ky sezon ka qenë një m… Humbëm finalen dhe nuk fituam kundër askujt në Premier League. Është shumë e dhimbshme, do përpiqemi të mbyllim sezonin dhe pastaj do shohim çfarë ndodh”, deklaroi ai për mediet. Ai shtoi: “Deri në finale i kam luajtur të gjitha ndeshjet, kam ndihmuar ekipin dhe sot luaj vetëm 20 minuta… Nuk e kuptoj. Finalja, sezoni, gjendja e klubit… Do përpiqem të shijoj pushimet e verës dhe pastaj do të vendos.”

Pavarësisht polemikave, Garnacho ka qenë një nga lojtarët më të përdorur nga Amorim këtë sezon, me 58 ndeshje në total, duke kontribuar me 11 gola dhe 11 asistime. Ai ka kontratë me Manchester United deri në verën e vitit 2028, por deklaratat e fundit lënë të kuptohet se një largim nga “Old Trafford” nuk është i përjashtuar. Nga ana tjetër, edhe Ruben Amorim ka vënë në pikëpyetje të ardhmen e tij, duke deklaruar se është i gatshëm të largohet pa asnjë kompensim financiar, nëse drejtuesit e klubit nuk e konsiderojnë më të duhurin për drejtimin e skuadrës. Një verë e nxehtë pritet në “Teatrin e Ëndrrave”, jo vetëm për transferimet, por edhe për të ardhmen e disa figurave kyçe.

sfidanti.al

Tags: Alejandro Garnacho