Tensionet ndërkombëtare kanë hedhur hije mbi FIFA World Cup 2026, turneu i parë që do të organizohet nga tri vende: Canada, United States dhe Mexico. Operacioni ushtarak i ndërmarrë nga SHBA-ja dhe Izraeli kundër Iranit ka ngritur pikëpyetje serioze mbi pjesëmarrjen e përfaqësueses iraniane në turne. Irani ka planifikuar të zhvillojë dy ndeshje të fazës së grupeve në Los Angeles dhe një në Seattle. Sipas burimeve të pakonfirmuara, presidenti i Federatës iraniane, Mehdi Taj, është shprehur se prania në Botëror duket e pasigurt, duke theksuar se vendimi final do të merret nga autoritetet sportive. Në Grupin G, Irani pritet të përballet me Belgjikën, Zelandën e Re dhe Egjiptin. Sekretari i përgjithshëm i FIFA-s, Mattias Grafström, deklaroi se organizata po ndjek me kujdes situatën globale. “Është herët për komente të detajuara, por do të monitorojmë zhvillimet. Objektivi ynë është që Botërori të zhvillohet në siguri të plotë, me të gjitha skuadrat pjesëmarrëse”, u shpreh ai gjatë një takimi në Cardiff.

Ndërkohë, shqetësimet për sigurinë prekin edhe Meksikën, ndërsa në Katar janë pezulluar ndeshjet e kampionatit vendas pas tensioneve ushtarake. Në Doha është vënë në pikëpyetje edhe zhvillimi i “Finalissima”-s mes Spanjës dhe Argjentinës, për të cilën janë shitur 90 mijë bileta. Situata mbetet e paqartë, ndërsa FIFA dhe autoritetet vendase shpresojnë që kriza të zbutet në kohë për të garantuar një Botëror të sigurt në verën e vitit 2026.

sfidanti.al