Në total, ekuilibri është në favor të ekipit që ndodhet në veri të La Manshit (apo Kanalit Anglez). Anglia ka bilanc mjaft pozitiv me Francën kur vjen puna te përballjet e kombëtareve të futbollit, por kjo vlen deri në një farë mase. Shpikësit e futbollit gëzojnë supremacinë ndaj rivalëve të çerekfinales së Botërorit në Katar falë traditës më të hershme dhe forcës së dikurshme, aq sa arritën 6 fitore radhazi fillimisht dhe patën 10 fitore në 11 ndeshje deri në 1955. Gjithsesi, me të lënë pas vitin 1997, “tre luanët” sikur i harruan fitoret. Në 25 vjet (çerek shekulli) kanë vetëm një sukses, 2-0 në miqësoren e vitit 2015, ndërsa janë plot 5 humbje e 2 barazime. Sidoqoftë, shumica kanë qenë miqësore, ndërsa në sfida zyrtare kemi vetëm 1 fitore franceze (2-1 në Euro 2004), dy barazime (1-1 e 0-0) si dhe dy fitore të Anglisë veçse në vitet e largëta 1966 dhe 1982.

Sfidanti.al