Për Liverpoolin, fitimi i titullit të 20-të të kampionatit anglez duket thjesht çështje kohe. ‘The Reds’ po ecin me ritëm të shpejtë drejt triumfit në Premier League, me një avantazh prej 13 pikësh ndaj Arsenalit (i cili ka një ndeshje më pak), ndërkohë që kanë mbetur vetëm 10 ndeshje deri në fund.

Një marshim triumfal që, në fakt, nuk ka përfshirë Federico Chiesa-n, i cili mbërriti në verë në Anfield me shumë pritshmëri, por nuk ka arritur të bëjë ndikimin e pritur, për shkak të problemeve të shumta fizike që kanë ndikuar në gjendjen e tij.

Ish-lojtari i Juventusit dhe Fiorentinës ka regjistruar deri tani vetëm 10 paraqitje të ndara mes Champions League, Premier League, FA Cup dhe EFL Cup. Ai debutoi me ‘The Reds’ më 17 shtator, në ndeshjen e parë të sezonit të tyre në Champions League, duke zëvendësuar Mohamed Salah në minutat shtesë të fitores 1-3 ndaj Milanit në transfertë. Ky përdorim i kufizuar vë madje në rrezik edhe marrjen e medaljes për fitoren e Premier League, që tashmë duket e sigurt për Liverpoolin: me vetëm 3 paraqitje dhe 25 minuta të luajtura gjithsej, ai nuk do të mund të përmbushë kriteret për të marrë medaljen.

Sipas rregullores së brendshme të Premier League, “medaljet mund t’u shpërndahen lojtarëve vetëm nëse ata kanë regjistruar të paktën pesë paraqitje në kampionat gjatë sezonit që ka përfunduar me fitimin e titullit”.

sfidanti.al