Boksieri shqiptar Nelson Hysa ka shpalosur ambiciet e tij të mëdha për të ardhmen, duke synuar të fitojë titullin e kampionit të botës në peshat e rënda dhe të shkruajë historinë e boksit shqiptar.

Në prag të sfidës së radhës, Hysa ka bërë të ditur se më 28 nëntor, në Ditën e Pavarësisë së Shqipërisë, do të ngjitet në ring me një motivim të veçantë, duke përfaqësuar vendin dhe popullin e tij. “Koha ime po vjen! Në Ditën e Pavarësisë së Shqipërisë, do të ngjitem në ring për vendin dhe popullin tim. Ëndrra ime është ta sjell titullin e kampionit të botës në peshat e rënda në vendin tim dhe ta shkruaj emrin tim në histori”, shkroi boksieri shqiptar.

Mesazhi i Hysës tregon qartë synimet e tij për të arritur majat e boksit ndërkombëtar. Ai kërkon që suksesi i radhës të mos jetë thjesht një arritje personale, por edhe një moment krenarie për Shqipërinë. Data 28 nëntor merr kështu një domethënie të veçantë për boksierin, i cili dëshiron ta lidhë rrugëtimin e tij drejt majës me një nga ditët më të rëndësishme të historisë shqiptare.

Tashmë, pritshmëritë janë të larta, ndërsa Hysa synon që me paraqitjet e tij në ring të hedhë hapa të rëndësishëm drejt realizimit të ëndrrës për titullin botëror në peshat e rënda.