Raphinha është bërë lojtari më me ndikim i momentit, për Barcelonën, La Ligën, Evropën dhe futbollin botëror. Braziliani ka shënuar një shifër të pabesueshme prej 12 golash në shtatë ndeshje të kampionatit dhe dy të tjerë në Ligën e Kampionëve, ndërsa statistikat e tij janë historike. Forma e jashtëzakonshme e 29-vjeçarit i atribuohet cilësisë, punës së palodhur dhe sakrificave të tij, por një rol të rëndësishëm në këtë transformim ka pasur edhe Hansi Flick, i cili jo vetëm e zbuloi si një lojtar “nëntësh fals”, por mbi të gjitha i dha besimin e nevojshëm.
Çelësi i suksesit të ish-lojtarit të Leeds qëndron te besimi që Flick i ka ngulitur, duke e bindur për talentin, potencialin, lidershipin dhe rëndësinë e tij për skuadrën. Kjo punë nisi tre sezone më parë, kur trajneri gjerman mori drejtimin e Barcelonës. Klubi katalanas nënshkroi me Raphinhan në verën e vitit 2022, kur trajner ishte Xavi, në një marrëveshje me vlerë rreth 55 milionë euro. Në dy sezonet e tij të para, braziliani pati paraqitje të mira, duke luajtur 87 ndeshje, shënuar 20 gola dhe dhënë 25 asistime.
Megjithatë, në verën e vitit 2024, Raphinha mendoi të largohej nga Barcelona, pasi kishte marrë oferta fitimprurëse dhe ende nuk kishte ndikimin brenda ekipit dhe dhomës së zhveshjes që gëzon sot. Situata ndryshoi me ardhjen e Flick. Trajneri gjerman zhvilloi një bisedë me brazilianin dhe i shprehu besimin e tij, duke i bërë të qartë se jo vetëm do të ishte i rëndësishëm për ekipin, por se Barcelona kishte nevojë për të. “Po largohesha nga klubi para se të fillonte sezoni. Trajneri ishte shumë i rëndësishëm në ndryshimin e mendjes sime, në bindjen time për të qëndruar. Ai më dha besim, ai ndryshoi gjithçka për mua”, tha Raphinha në fund të sezonit 2024-25.
Flick e kuptoi shpejt se Raphinha kishte nevojë të ndihej i vlerësuar dhe iu përkushtua forcimit të vetëbesimit të tij. Ai konfirmoi besimin në cilësinë e brazilianit përmes vendimeve të tij, duke e aktivizuar rregullisht nga minuta e parë dhe duke komunikuar vazhdimisht me të. Rezultati ishte i dukshëm: Raphinha kaloi nga 10 gola në sezon nën drejtimin e Xavit në 32 gola në sezonin e parë së bashku me Flick. Në sezonin 2025-26, koha e tij e lojës u reduktua për shkak të dëmtimeve të ndryshme, por trajneri gjerman vazhdoi të punonte me brazilianin, duke e inkurajuar dhe besuar tek potenciali i tij.
