Sulmuesi i Manchester Cityt, Erling Haaland, ka marrë katër certifikata të Rekordeve Botërore “Guinness” për arritjet e tij të jashtëzakonshme në shënimin e golave. 26-vjeçari norvegjez është vlerësuar për rekordet e vendosura në Premier League, Ligën e Kampionëve dhe Ligën e Kombeve. Haaland është lojtari më i shpejtë që ka arritur 100 gola në Premier League, duke e bërë këtë në vetëm 111 ndeshje. Rekordi u konfirmua më 2 dhjetor 2025, kur ai shënoi ndaj Fulhamit.

Ai mban gjithashtu rekordin për më shumë gola të shënuar në një sezon të vetëm të kampionatit anglez. Në sezonin 2022/23, Haaland realizoi 36 gola, duke kaluar rekordin e mëparshëm prej 34 golash, të mbajtur nga Andy Cole dhe Alan Shearer. Certifikata e tretë lidhet me Ligën e Kombeve, ku Haaland është golashënuesi më i mirë në historinë e garës me 19 gola të shënuar ndërmjet shtatorit 2020 dhe nëntorit 2024. Certifikata e katërt e njeh për barazimin e rekordit të Ligës së Kampionëve për më shumë gola të shënuar në një ndeshje. Haaland shënoi pesë gola ndaj Leipzig më 14 mars 2023, duke iu bashkuar Lionel Messit dhe Luiz Adrianos si lojtarët e vetëm që e kanë arritur këtë rekord. Në pak më shumë se tre vjet në futbollin anglez, Haaland është shndërruar në një nga sulmuesit më dominues statistikisht. Tani ai synon të vazhdojë suksesin me Cityn, i cili këtë sezon do të kërkojë rikthimin te titulli i Premier League.