Edon Zhegrova, Luciano Spalletti dhe Fabio Miretti ishin protagonistët kryesorë të fitores së Juventusit kundër Udineses. Bardhezinjtë të drejtuar nga Luciano Spalletti triumfuan me një rezultat të pastër 2-0 ndaj skuadrës së Kosta Runjaic dhe siguruann kalimin në çerekfinalet e Kupës së Italisë, ku do të përballen me Atalantën ose Genoa-n. Pas ndeshjes, Spalletti doli në konferencë për shtyp dhe analizoi paraqitjen e ekipit të tij.

“Fitorja është e rëndësishme, sepse është ilaçi i vetëm i vërtetë për t’u ndier i çliruar nga presioni dhe tensioni. Gjithmonë kam parë që gjërat përmirësohen dita-ditës. Tani ekipi po fillon të mendojë ndryshe me topin në këmbë. Sot duhet të jemi të kënaqur, sepse bëmë gjëra të mira.”

Për Zhegrovën: “Jam i kënaqur me paraqitjen e Zhegrovës dhe më gëzoi fakti që e pashë të vraponte deri në zonën tonë. Ai është një lojtar me pasion, i cili gjithmonë të intimidon.” Për Mirettin: “Bëri një ndeshje të mirë, sepse gjithmonë e sheh përtej pasimit të parë. Atij i duheshin më shumë minuta dhe kjo do të jetë vendimtare që ai të përmirësohet në maksimum.”

Zhegrova hyri në fushë në minutat e fundit të takimit, duke treguar sinjale shumë pozitive. Kosovarit ende i duhet kohë që të rikthejë plotësisht formën, pasi ka qenë jashtë fushave për rreth nëntë muaj, por hapat e tij janë të sigurt dhe premtues. Ndërkohë, Miretti e nisi titullar,  ashtu si kundër Bodos,  dhe ishte bindës në çdo aspekt të lojës.

Falë këtyre paraqitjeve, Spalletti e pret sfidën kundër Napolit me më shumë besim dhe qetësi.

sfidanti.al