Arabia Saudite ka siguruar zyrtarisht pjesëmarrjen në Kampionatin Botëror 2026, pas barazimit pa gola (0-0) ndaj Irakut në ndeshjen e fundit të raundit të katërt të kualifikueseve aziatike. Rezultati i barabartë i mjaftoi ekipit arab për të ruajtur vendin e parë në Grupin B, falë epërsisë në golat e shënuar.
Sipas të përditshmes Asharq Business, çdo futbollist i përfaqësueses saudite do të marrë një shpërblim rreth një milion euro për kualifikimin në Botërorin e ardhshëm. Shpërblimi do të financohet nga princi Abdulaziz bin Turki Al Faisal, ministër i sportit i Arabisë Saudite, si shenjë mirënjohjeje për suksesin e ekipit kombëtar.
Ky kualifikim shënon pjesëmarrjen e shtatë të Arabisë Saudite në një Kampionat Botëror dhe të tretën radhazi, duke konfirmuar stabilitetin dhe progresin e futbollit saudit në nivel ndërkombëtar. Performanca më e mirë e tyre mbetet ajo e vitit 1994, kur arritën deri në të tetat e finales. Kupa e Botës 2026 do të zhvillohet nga 11 qershor deri më 19 korrik, në Shtetet e Bashkuara, Kanada dhe Meksikë. Arabia Saudite synon të përsërisë, e ndoshta të tejkalojë, suksesin historik të mëparshëm, duke përfaqësuar me krenari Lindjen e Mesme në arenën më të madhe të futbollit botëror.
sfidanti.al
