Për herë të parë që nga hapja e hetimit gjyqësor për sulmin e tij të dyshuar seksual, Ashraf Hakimi ka folur publikisht. Mbrojtësi i PSG-së dhe i ekipit kombëtar maroken e bëri këtë në një intervistë ekskluzive me Clique, e cila do të transmetohet e plotë sonte në Canal+. “Gjëja më e rreme që u tha për mua? Përdhunimi i asaj vajzës. Ishte goditja më e vështirë që kam pësuar ndonjëherë, për mua dhe për familjen time. Fëmijët e mi janë të vegjël dhe një ditë do ta lexojnë atë që është shkruar, të imagjinosh se si gjejnë akuza të tilla për babanë e tyre, duke e ditur se janë gënjeshtra, dhemb.” Hakimi kujtoi momentin kur mësoi për ankesën: “Avokati im ma tha. Ne e dinim se mund të ndodhte. Jam i qetë, e di kush jam, e di që nuk kam bërë asgjë dhe nuk do ta bëja kurrë. Kërkova të flas me policinë dhe të jap ADN-në time. Megjithatë, akuzuesi nuk ka bashkëpunuar. Falë punës së policisë, kanë dalë informacione të rëndësishme.”

Mbrojtësi, i gjashti në renditjen e fundit të “Topit të Artë”, pranoi se ka ndryshuar rrethin e miqve të tij: “Në futboll, ne jemi të ekspozuar ndaj shumë rreziqeve, përfshirë shantazhin. Pas këtij incidenti, e kam ngushtuar ndjeshëm rrethin tim të besimit.” Së fundmi, ai sulmoi shtypin: “Ata kanë njollosur emrin dhe dinjitetin tim duke folur pa e ditur. Nuk dua që askush të akuzohet padrejtësisht.”

Sfidanti.al