Lucas Vázquez është zyrtarisht lojtar i Bayer Leverkusen-it. Pas dhjetë sezoneve të suksesshme me Real Madridin, ku zhvilloi 402 ndeshje, shënoi 38 gola dhe dhuroi 60 asistime, futbollisti galician nis për herë të parë një aventurë në Bundesligë.

Në prezantimin e tij me fanellën numër 21, Vázquez u shpreh: “Jam i lumtur të vazhdoj karrierën te Leverkusen-i, një klub për të cilin më kanë folur shumë Xabi Alonso dhe Dani Carvajal. Ky është një ekip i uritur për fitore dhe me ambicie të mëdha, gjë që përputhet plotësisht me pritshmëritë e mia.”

Lojtari 34-vjeçar largohet nga Madridi me një palmares të pasur: 23 trofe, mes tyre 5 Champions League, 4 Superkupa Europe, 4 Botërorë Klubesh dhe 4 La Liga. Ai ka luajtur gjithashtu një sezon i huazuar tek Espanyoli (2014-2015).

Kontrata me klubin gjerman është e vlefshme deri më 30 qershor 2027 dhe vjen si përgjigje ndaj largimit të Jeremie Frimpong, i transferuar këtë verë te Liverpooli për 40 milionë euro.

Drejtori sportiv i Leverkusenit, Simon Rolfes, e cilësoi afrimin si një hap të madh për ekipin: “Lucas Vázquez është një lojtar me eksperiencë të jashtëzakonshme, ka fituar gjithçka me Real Madridin dhe do të jetë një shtyllë e rëndësishme për ne. Ai ka teknikë, inteligjencë taktike dhe do të ndikojë shumë në lojën tonë.”

Pas mbylljes së kontratës me Realin pas Kupës së Botës për Klube, Vázquez ishte i lirë. Ai u përfol për kalim në Arabinë Saudite, Turqi apo edhe një rikthim te Deportivo La Coruña, por në fund zgjodhi sfidën gjermane për të vazhduar në nivelet më të larta të futbollit evropian.

Me këtë lëvizje, Leverkuseni jo vetëm që fiton një lojtar me eksperiencë të madhe ndërkombëtare, por edhe një profil lideri që pritet të japë kontribut të menjëhershëm në sezonet e ardhshme.

sfidanti.al