E ardhmja e Granit Xhakës është vazhdimisht në qendër të thashethemeve për transferime, me AC Milan dhe Juventus midis klubeve të interesuara për mesfushorin zviceran. Simon Rolfes, drejtori sportiv i Bayer Leverkusen, hodhi dritë mbi situatën, duke folur për Bild në lidhje me të ardhmen e ish-lojtarit të Arsenalit: “Ka interes, por ende asgjë konkrete”, tha ai.

Rolfes theksoi se një vendim përfundimtar duhet të merret së shpejti: “Ne jemi në procesin e kompletimit të skuadrës, padyshim. Graniti luan një rol të rëndësishëm në këtë proces, kështu që nuk do të jetë një çështje që do të zvarritet gjatë gjithë afatit të transferimeve”.

Ai shtoi më pas se Leverkusen, nënkampionët në fuqi të Bundesligës, do të bëjnë disa ndryshime në skuadrën e tyre, por me një afat kohor specifik: “Do të ketë ende disa ndryshime, por në një moment skuadra do të duhet të jetë 95% e plotë. Dhe Graniti është një pjesë kyçe e gjithë kësaj. Pra, vendimi do të vijë shpejt”.

Milani dhe Juventusi, të cilët po vlerësojnë lojtarë me përvojë për të forcuar mesfushën e tyre përpara sezonit të ri, po e monitorojnë nga afër situatën. Xhaka, 31 vjeç, vjen nga dy sezone me performanca të shkëlqyera në Gjermani dhe vlerësohet shumë për lidershipin, aftësitë teknike dhe vizionin e tij. Ditët në vijim mund të jenë vendimtare.

sfidanti.al