Jack Grealish mbërriti te Manchester City në verën e vitit 2021 si një nga transferimet më të bujshme në historinë e Premier League. Klubi anglez pagoi 100 milionë paundë (rreth 117.5 milionë euro) për yllin e Aston Villës, duke e kthyer atë në lojtarin më të shtrenjtë britanik të të gjitha kohërave. Megjithatë, tri vite më vonë, aventura e tij në “Etihad” duket se ka arritur një pikë kthese. Sezoni 2022-2023 ishte kulmi i Grealish te City, ku ai regjistroi 50 ndeshje, 5 gola dhe 11 asistime në të gjitha garat. Në atë kohë, vlera e tij në treg arrinte 75 milionë euro sipas “Transfermarkt”. Sot, ajo është reduktuar ndjeshëm në vetëm 28 milionë euro. Lëndimet e vazhdueshme, mungesa e qëndrueshmërisë dhe konkurrenca e fortë në skuadër kanë ndikuar në rënien e formës së tij. Vetëm në sezonin 2023-2024, ai mungoi në 17 ndeshje për shkak të problemeve fizike, duke humbur vendin titullar. “Savinho është në formë më të mirë se Jack, prandaj po luaj me të”, deklaroi Guardiola në fillim të vitit.

Jeta jashtë fushës dhe problemet personale

Faktorët jashtë fushës gjithashtu kanë ndikuar negativisht në karrierën e Grealish. Në fund të vitit 2023, shtëpia e tij u grabit ndërsa familja ndodhej brenda. Ngjarja la pasoja emocionale te lojtari. “Ka qenë një përvojë traumatike, por jam mirënjohës që askush nuk u lëndua”, shkroi ai në Instagram. Për më tepër, pjesëmarrjet e tij të shpeshta në festa dhe klubet e natës kanë ngritur pikëpyetje për përkushtimin e tij profesional – një aspekt që i ka prishur imazhin edhe te drejtuesit e klubit.

E ardhmja e paqartë

Sipas raportimeve të “The Sun”, Manchester City është i gatshëm ta shesë Grealish për rreth 46 milionë euro, më pak se shuma fillestare që investuan. “Jack është një lojtar i jashtëzakonshëm që duhet të luajë çdo tre ditë. Kjo nuk ka ndodhur së fundmi. Me ne apo diku tjetër – këtë do ta vendosin ai, agjenti i tij dhe klubi”, deklaroi Guardiola. Megjithatë, një transferim nuk është i lehtë. 29-vjeçari ka kontratë deri në vitin 2027 dhe pagë të lartë, ndërsa forma e tij aktuale nuk bind klubet e interesuara për një investim të madh. Një talent i madh që premtoi shumë, por që ende nuk ka arritur të përmbushë pritshmëritë te kampionët e Anglisë.

sfidanti.al